Election

അധികാരം അലങ്കാരമല്ല..! ഉത്തരവാദിത്തവും മുൾക്കിരീടവുമാണ്..!
'യൂഫ്രട്ടീസ് നദിക്കരയിൽ ഒരാട്ടിൻകുട്ടി വിശന്നു കരയുന്നുണ്ടെങ്കിൽപോലും ഞാനെന്റെ സ്രഷ്ടാവിനോട് മറുപടിപറയേണ്ടിവരും' 
ലോകത്തെ ഏറ്റവും വലിയ നീതിമാനായ ഭരണാധികാരിയെന്ന് വിമർശകർ പോലും പുകഴ്ത്തിയ ഖലീഫ ഉമർ(റ)ന്റേതാണ് ഈ വാക്കുകൾ.
അധികാരം മനുഷ്യനെ സംബന്ധിച്ചിടത്തോളം അലങ്കാരമല്ല! ഉത്തരവാദിത്തവും മുൾകിരീടവുമാണെന്നു തന്നെയാണ് ഖലീഫ ഉമറിന്റെ ചരിത്രം നമ്മെ ബോധ്യപ്പെടുത്തുന്നത്. 
ലോക ചരിത്രത്തിൽ സമാനതകളില്ലാത്ത ഭരണമികവായിരുന്നു ഉമർ(റ)ന്റെ ഭരണ കാലഘട്ടം. ലോകത്ത് ആദ്യമായി റേഷൻ സമ്പ്രദായം കൊണ്ടുവന്നത് അദ്ദേഹമായിരുന്നു. മുലകുടിപ്രായം കഴിഞ്ഞ ഏതൊരാൾക്കും അന്ന് ഭക്ഷണ സാധനങ്ങൾ ലഭ്യമാക്കിയിരുന്നു.
ഒരിക്കൽ ഖലീഫ ഉമർ തന്റെ പ്രജകളുടെ ക്ഷേമമന്വേഷിക്കാൻ ഊരു ചുറ്റുതിനിടെ ഒരു കുഞ്ഞിന്റെ കരച്ചിൽ കേട്ടു. തുടർച്ചയായ കരച്ചിൽ അദ്ദേഹത്തിന്റെ മനസ്സിനെ അസ്വസ്ഥനാക്കി. കാര്യമറിയാൻ അദ്ദേഹം ആ വീട്ടിൽ ചെന്നു. വേഷപ്രഛന്നനായ ഭരണാധികാരിയെ ആ വീട്ടുകാർ തിരിച്ചറിഞ്ഞിരുന്നില്ല. ഉമർ(റ) ചോദിച്ചു: 'എന്താണ് ഈ കുഞ്ഞ് വാവിട്ടു കരയുന്നത്.?' ആ സ്ത്രീ മറുപടി പറഞ്ഞു: 'ഞങ്ങളുടെ നാട്ടിലെ ഭരണാധികാരി മുലകുടിക്കാത്ത കുട്ടികൾക്ക് വരെയാണ് റേഷൻ നൽകുന്നത്. മുലകൊടുക്കാതിരിക്കുന്നത് റേഷൻ ലഭിക്കുവാൻ വേണ്ടിയാണ്..'.
ഇതുകേട്ട ഉമർ(റ) വളരെ ദുഃഖിതനായി അവിടെനിന്നു മടങ്ങി. വീട്ടിൽ തിരിച്ചെത്തിയ അദ്ദേഹം പൊട്ടിക്കരഞ്ഞു. ചാട്ടുവാറുകൊണ്ട് ദേഹത്താകെ അടിച്ചു. അദ്ദേഹം പറഞ്ഞു: എന്റെ റബ്ബേ, ഞാനെത്ര നിർഭാഗ്യവാൻ... എന്റെ തീരുമാനം ഒരു കുഞ്ഞിന്റെ അവകാശത്തെയാണല്ലോ കവർന്നെടെുത്തത്.. എനിക്കു നീ പൊറുത്തു തരേണമേ...! ഇടറിക്കൊണ്ട് അദ്ദേഹം പ്രാർത്ഥിച്ചു.
2015 നവംബർ 7 ശനിയാഴ്ച) ജനങ്ങളാൽ തെരഞ്ഞെടുക്കപ്പെട്ട് അധികാരം വന്നുചേരുന്ന ഓരോ ജനപ്രതിനിധിയും ഉമറിന്റെ ചരിത്രം നെഞ്ചേടു ചേർക്കേണ്ടതുണ്ട്. അത് പകർത്താനായി പരിശ്രമിക്കേണ്ടതുണ്ട്.
അധികാരത്തിന്റെ തേൻരുചിക്കുമ്പോൾ തെരഞ്ഞെടുക്കപ്പെടുന്ന ഓരോ പ്രതിനിധിയും തിരിച്ചറിയണം അത് അതികൈപ്പുള്ള മുൾക്കിരീടമാണെന്ന്.
പ്രതീക്ഷയർപ്പിച്ച ജനങ്ങൾക്ക് തങ്ങളാലാവുന്നത് ചെയ്യാൻ ഓരോ പ്രതിനിധിക്കും കഴിയട്ടെ എന്നാശംസിക്കുന്നു..
Courtesy: Wisdom - Global Islamic Mission